ئه‌م شێعره لە لایەن هاوڕێم ”حەمە قادر” شاعیر و سینەماکاری کوردوستانی باشور وەرگێردراوە بۆ زمانی کووردی. هەروەها خوێندنەوە شێعرەکە بە دەنگی خۆیەتی
“سەفەرنامەی بەرزەخ”
چەقیو، لەسەرچۆک، مات!
گەڕاوە لە جەنگێکی بێئاکام لەگەل خۆمی خۆم
کەوتو لەسەر پێستی شێداری بێشەڵانی چنارە کێویەکان
ڕاماو لە سەمای پەڵە هەورێک لە ئاسمانی بەرین
نوقمی ئەندێشەیەک کە قەت لەدایک نابێت.
«رەنگە خوایەک لە سووچێکەوە سەیرم کات»
هەنووکە «لێرە»م
کەڵەکە لە گۆشتی بۆگەن و خوێنی بەخووڕ
ونبوو لە دەهلیزەکانی یەقینێک کە هاتم داگیری کەم
بەڵام چەن زوو لە سێبەریا کەوتمه گومان!
سبەینێش دیسان «لێرە»م
ئاوێتەی ماتەم و تاسە، مەیل و جەخار
چاو کە ئەنوقێنم لە لمەجاڕی سووتێنەری یادەوریم
دوو چاوی گەرم لە نووتەکی ژورێک لە تای هاوین
بە ئەژنۆ لەرزۆکەکانم پێدەکەنن.
ئەمێستا من دوژمنی خۆمم و هیچم لە یاد نیە
جگە لە جەستەی ڕووتی ئەو ژنانەی
نیوەشەوان پەنجەی شایەتیمان دەخەنە سەر لیۆیان و
فەرمانی بێدەنگی بە شەوق و هزرم ئەدەن.
هزرێکی کەڵەکەبوو لە گۆشتی بۆگەن و خوێنی بەخووڕ
شەوقێکی ونبوو لە دەهلیزەکانی یەقینێک کە هاتم داگیری کەم
بەلام چەن زوو بومە گاڵتەجاری!
هاوکات «لەوێ» بووم
لە سوورایی نزمی ئاسۆ کە زوو خامۆش بوو
وەک قژی تەڵخی رژاو بەسەر شانە ڕووتەکانی دایکم
جووان بوو
هێندە جووان کە بمگریێنێ
بەلام سوور هەڵگەڕام!
سوور و گەرم
گەڕاوە لە جەنگێکی بێئاکام لە گەڵ دڵی خۆم
دڵێکی هاوزێی ناکامی لە بەرزەخی ژنان
کە سەرتاپا هەڵدەقوڵی لە ماتەم و تاسە
لە هەزار مەیل و جەخار
چیتر کوێرەڕیەکیش بەرەو بەرزاییەکان شک نابات.
هەناسە لێبڕاو، تیاماو، کوێرانە
وەک گەڕاڵی تیاچوو لە بنی یادەوەریم بۆ شتێک ئەگەڕێم
کە هەرگیز نەمناسیوە
یادەوەریەک وەک شاری به‌جێماو لە شەڕ، تەڵخ وڵێڵ
کۆلانەکان و مناڵەکانی بێناونیشان
تا کەسێ هەستێ و بە ناوێک کە لەیادیان کردووە
بانگیان کات.
هەنووکە من دوژمنی خۆمم
ئاوەها بێ نەخشەو بێ چرا هاتومەتە شەڕو
جگه لە لوورەی ئەو زریانانەی لە سیەکانمەوە دێن
ئایەتێکم پێ نیە.
«لەوێ» لە دایک بووم تا کەلاوەکان کاولتر کەم و
«لێرە» داماڵراو لەوداڵدانەی کە خەڵکەکەی تەمەنێک
لە گوێی ئاگرەکەیدا خەوتبوون
هەڵاتم!
«رەنگە خوایەک لە سووچێکەوە سەیرم کات.»
لە هەڵاتنا داڵدەیەک نیە
ئەوەی بەردەوام هەڵدێ رزگاریەکەی بە زەمەن بەخشیوەو
زامه کۆنەکان بە برینی قووڵتر خۆش ئەکاتەوە.
ئەوەیش لە خۆی ئەپرسێ «من کێم؟»
چیتر ناوێک بۆ خۆی نادۆزیتەوەو
ئەوەی کە لە ناوێکدا نیشتەجێیە
هەرگیز هیچ ناپرسێ.
وەک سەمای هێمنی ئەو پەڵە هەورە بەرەڵلایە لە ئاسمانی بەڕین
با کوێی پێخۆشبێ دەیبا!
تۆش! ئەی کەوتوو لەسەر پێستی شێداری بێشەڵانی چنارە کێویەکان
لە تۆدا شیرەی دارەکان نیە تا تەمەنێک بە پێوە بوەستی
تا لەقلەقەکان لەسەر شانە تەریبەکانت هێلانە بکەن
ڕەگی تۆ کوێی پێخۆشبێ دەڕوێ
لە خەونی ناکۆتا تێراو دەبێ!
تۆ پارچە پارچە گەورە دەبی و
لەت لەتیش دەمری!
«رەنگە خوایەک لە سووچێکەوە تەماشات کات.»